أول حاجة رمضان كريم ،ويارب تكون هذه السنة جاية وحاملة معاها كل الخير والرزق وراحة البال ،أصلاً رمضان اسمه شهر الخير والبركات ،مليان روحانيات وعبادات وحاجات حلوة كثير؛ بنقعد نستناها من السنة للسنة، عشان ننبسط فيها ، بلمة العيلة، وزيارة الأرحام، وكركبة السحور، ودوشة الإفطار، والتنافس بقراءة القرآن ،وتبادل العزايم، ومين أحسن وحدة من الكناين بتعمل القطايف ؟
رمضان فيه القلوب بتنشرح، والنفوس بتصفى، والهداية والسكينة بتطرق أبواب كثيرة ، وصحن الطبيخ قبل الإفطار بيدخل كذا بيت؛ وبتفوح ريحته من نصف بيوت الحارة ، والمفتول الأصلي مع اليخنية ، إللي بيصعنوا بحب حتى يتوزع رحمة عن روح الأموات على الجيران ، بتلاقيه بيوصل حتى لبعد سابع جار .
كل هذا الكلام حلو وكثير ناس فاهماه وبتحس فيه، وهذا أصلا جو رمضان وطقوسه يلي بنحبها ..
بس الشغلة المهمة إللي حنحكي فيها، هو رمضان بيضايق حد ؟ طيب بيعصبه ؟
انت لحالك إللي صايم ؟ ليش بتضلك تقول لمرتك “تخلنيش أضيع صيامي”! وتحكي لابنك “روق لأني صايم”!
وتحمّلنا جميلة إنك صايم؛ وكأنك الوحيد بالكوكب إللي صايم! ، بتطلع مع السواق بالسيارة؛ بتتناقر معاه على فكة خمسة شيكل ، بتروح على السوق بترمي كيس البندورة؛ وبتبطل تشتري ،بترجع عالبيت بتصير تتفشش بأولاد أخوك الصغار؛ إللي بيلعبوا من الزهق قدام البيت.
وحد الله يا راجل ،رمضان مش هيك ،انت فاهم الموضوع غلط
رمضان أجواؤه كلها جمال وروحانيات وراحة بال وسكينة ؛ مش عصبية ونقرزة على سيجارة بعد ما تشرب كاسة المية على الفطرة، ولا إدمان على كاسة قهوة؛ وتكمل نصف يومك نايم وتصحى متعفرت ..
رمضان عبادة فيه كل حاجة حلوة بتقربنا إلى الله ،بنتفقد فيه جيرانا وبنتصدق فيه عالغلابا، وبنزكي فيه مالنا عشان ربنا يباركلنا فيه، وبنزور فيه أرحامنا ،أختك وعمتك وخالتك والزيارة هنا مش أداء واجب الله يرضى عليك ،لا الزيارة فيها كل الواجب والتأصيل في الدين كمان ،خليها زيارة كافية ووافية مش تسّلم عن الباب، وتعمل حالك مستعجل، و تحط رطل الموز ولا صنية الحلويات وتمشي، أعطي الزيارة حقها لأنه أختك ولا عمتك بتقعد تستنى فيها من أول رمضان؛ حتى تتباهى فيك وبزيارتك ،بغَضّ النظر عن هديتك، وشو قدمت إلها بالزيارة..
وفي كمان شغلة مهمة لازم تفهمها ،العفرتة على الفطور ملهاش لزوم ،والسفرة الطويلة والعشرين نوع من الأكل على السحور برضه ما إلها لزوم.
حاول تخلي هذه الشغلات ثانوية، وتركّز بعدد أجزاء القرآن إللي حتقرأهم، وتهتم أكثر بقيام الليل، وبالدعاء لربنا، وبليلة القدر وبصدقاتك.
ما بدي أنصحك، لأني مش داعية، بس عالأقل إحنا كلنا مقصّرين، ورمضان هذه فرصة لنقدر نتقرّب فيها من ربنا أكثر وأكثر..تقبل الله صالح أعمالنا وأعمالكم
و #سلامتك_وتعيش
