باختصارِ، الموضوع بده #فشّة_غل عنجد؛ لأنه الفضاوة ووقت الفراغ الكبير؛ فعلاً بتعمل أكثر من هيك ، ومتل ما قالوها زمان: “الفاضي بيعمل قاضي”، ما بِدنا نطوّل بالحكي، مين فينا إنسان كامل وما بيغلط ؟!
ما تفكروا بالإجابة كثير؛ لأنه ما في حدا كامل، والكمال لله، كلنا بشر بنغلط وفينا عيوب؛ لولا ستر ربنا علينا ،عشان هيك ما تمسكوا ورقة وقلم؛ وتقعدوا تصحِّحوا لغيركم بالقلم الأحمر، وما تحاسبوهم وكأنكم بتعرفوا بنواياهم، وكأنوا أنتم أحسن منهم ، و همّا بس بينتظروا هذا الانتقاد إللي قدمتوه بطريقة بتنعكس أكيد بالسلب مش بالإيجاب ولا مرة ..لأنه مش انتقاد سليم؛ نابع من صحبة وعلاقة فيها قبول من الطرفين.
النقد حاجة حلوة، وبنستفيد منها ؛ بس لمّا يكون نقد بناّء، ونابع من فكرة هدفها التقويم والتصحيح؛ مش حتى نراقب غيرنا؛ ونشوف شو بيكتب، وشو بيلبس، وشو بياكل، وشو بيشرب ؟!
يا صديقي ما سمعت بمَقولة “مَن راقب الناس مات همًّا” !
أكيد سمعتها وشفتها مكتوبة على الزجاج الخلفي لصاحب سيارة؛ دفع دم قلبه حتى يشتريها بالتقسيط، الله يرضى عنك ، اترك الناس بحالها؛ كل واحد فيه إللي بيكفيه (هَم، وغم، ووجع، وفَلس، وفقر، ومشاكل) بتوزّع على مدينة بحالها، حاول ما تحط حدا براسك؛ لأنه الدائرة بتدور، وظروفك زي ظروفه، حتتبدل وتتغير، ودوام الحال من المحال ، ما تِشمَت ولا تحكي على غيرك ، هذه النصيحة مش عابرة طريق ،ولا عشان نكتب هالسطرين وتطنشهم ، لأ ..وحياتك انه أهم حاجة حتى تريح رأسك، وتضلك بحالك، وما تتدخل بشؤون غيرك.
رسولُنا الكريمُ قال ” من حُسنِ إسلامِ المرءِ تَرْكُه ما لا يَعنيهِ ” شو بدّك أكثر من هيك دليل؛ حتى ما تشغِل حالك بشغلات لا حتقدم ولا حتأخّر في حياتك.
والحل موجود ع فكرة ،عشان تنهي وقت فراغك، أو عالأقل تقلّل منه ،بدل ما إنت قاعد للرايح وإللي جاي على مواقع التواصل؛ وتعمل سكرين شوت هان وهناك ،حاوِل تشغِل وقتك؛ و تصنع حاجة يستفيد غيرك منها، أو تكتب فكرة ،أو تتصفح موقع تستفيد منه بحياتك ؛لو مش ناوي، أو مش قادر، أو ما عندك هالعزيمة ، احضر فيلم وثائقي؛ أو حتى فيلم هندي ،المهم ما تخلي #فشة_غلك بغيرك وتصُب كل ضغطك على الناس.
فلانه طلعت.. وفلانه نزلت.. وفلان شوف شو لابس؟ ، وهذا من وين إله المصاري؟ وهذه ليش تطلقت ؟ وأبصَر ليش مهند ابن أم عدنان؛ بطّل يعلق عن ابن خاله خالد؟ وليش أبو أمجد، و سامي فكّوا شركتهم بالدكانة ، معقول حنين بتحب أحمد؟ بشوفها بتعلق عنده دايماً؟
أعطيني استفادة وحدة من هذه الأسئلة؛ لو أخذت الإجابة شو بتستفيد منها عنجد؟
المشكلة مش هان ؛ المشكلة انه في ناس؛ لما تكون فاضية بزيادة؛ بتلاقيها جاوبت من رأسها عالسؤال كمان، ونشر الإجابة ووزعها كأنه فاعل خير ..
الله يشغلكم بشغلات تستفيدوا منها وعنجد .. سيبوا الناس بحالها؛ لأنه فيها إللي بيكفيها.
#سلامتك_وتعيش
